Водителот на емисијата Gardeners’ World Адам Фрост и советничката за хортикултура од Кралското хортикултурно друштво (RHS) Клер Престон-Полит ги споделуваат своите најдобри совети како собните растенија да останат живи и здрави.
Изберете го вистинското растение
Многумина од нас избираат растенија што им се убави, но клучот за опстанок е тие да бидат прилагодени на условите во нашиот дом, вели Клер, хортикултурна советничка од RHS Garden Bridgewater.
„Мислам дека многу луѓе купуваат растенија што им се допаѓаат на прв поглед… ги носат дома, а потоа со месеци гледаат како полека пропаѓаат“, објаснува таа.
Често причината е многу едноставна – растението се наоѓа на погрешно место. Затоа не плашете се да го преместите низ станот и да му дадете „нова шанса за живот“. Клер вели дека светлите дневни соби, со многу природна светлина, се идеални за монстера, додека топлите и влажни кујни повеќе му одговараат на мирниот крин.
Ѓаволскиот бршлен го препорачува за бањи поради поголемата влажност, додека растението лажен рицинус е добар избор за потемни простории или ходници, пишува BBC.
Не претерувајте со полевањето
Една од најчестите грешки е прекумерното полевање. Наместо да претпоставувате дека на сите растенија им треба иста количина вода, важно е да ги научите нивните индивидуални потреби.
Кај честите собни растенија, како мирниот крин и пајаковото растение, кафените листови може да бидат јасен знак за претерано или недоволно полевање. Пред да додадете вода, проверете колку е сува почвата.
Кај други растенија, како кактуси и сукуленти, често ги „давиме“ со полевање што воопшто не им е потребно. Адам објаснува дека на овие растенија најчесто им треба само лесно прскање за да изгледаат свежо. Клер предлага користење подлошки за полевање или водени топчиња што постепено ослободуваат влага во почвата.
Според неа, растенијата што е најтешко да се „убијат“ се аспидистрата, hoya carnosa и сансеверијата (snake plant). Тие се многу отпорни на суша и можат долго да опстанат без полевање, а сансеверијата и аспидистрата добро поднесуваат и потемни делови од домот.
Зимно време полевајте помалку
Важно е негата на растенијата да се прилагоди на годишните времиња.
„Во пролет и лето можете да полевате почесто“, вели Клер, бидејќи тогаш растенијата активно растат.
На врвот на летото, некои растенија, како монстерата, може да се полеваат и два до три пати неделно. Во тој период важно е и да ги „храните“ со додавање ѓубриво во почвата за да имаат доволно хранливи материи. Сепак, во текот на есента и зимата ситуацијата се менува.
Лиснатите растенија влегуваат во полу-мирување бидејќи нивото на светлина е пониско. Почвата тогаш не е потребно да се прихранува, а на растенијата им треба значително помалку вода. Клер советува да почекате почвата целосно да се исуши пред повторно полевање.
Пресадувањето е исто така важно за здравјето на растенијата, а најдобро е да се направи во пролет, кога тие полесно развиваат корен. Знаци дека е време за поголема саксија се: корење што се збива на дното и страните на саксијата или излегува низ дренажните отвори, како и ситуација кога водата веднаш истекува низ дупчињата на дното.
Божиќната ѕвезда држете ја на топло
За многумина од нас, првата средба со собните растенија се случува за време на празниците, кога на подарок добиваме божиќна ѕвезда (poinsettia). Сепак, веќе на почетокот на јануари нејзините црвени листови често изгледаат згужвани и уморни. Тајната на успехот е во почитување на нејзиното мексиканско потекло, за полесно да се прилагоди на значително постудената клима, вели Адам.
„Потребна ѝ е топлина, никако не сака промаја“, објаснува тој, но додава дека треба да се држи подалеку од директно сонце.
Не бара многу вода, па полевајте ја дури кога почвата е сува. За да избегнете претерано полевање, саксијата можете секојдневно кратко да ја ставите во сад со вода, а потоа да ја вратите на место, или лесно да ја прскате. За да трае подолго од новогодишните одлуки, Адам советува божиќната ѕвезда да ја прихранувате еднаш месечно. Во април поткастрете ја, а во мај пресадете ја. Од септември треба да се премести во потемен простор најмалку 12 часа дневно – тоа го поттикнува повторното црвенеење на листовите, подготвени за следната празнична сезона.
Извор: odrzime.rs
